.. عنوان امسية رمضانية حضرتها قبل ساعات  

سارللي سنوات لم احضر اي محاضره من هذا النوع او بالاحرى امسية  دينيه ( اللي بتكون بقاعة وعدد الحضور يتعدى 50 ) .. بالزمنات حضرت محاضره لعمرو خالد و اخرى اروع من الروعة  للشيخ العريفي بعمان .. عدد حضورها تجاوز 500 .. و هذه الثالثة .. ما قبلها من محاضرات كان على مقاعد الدراسة .. و كان الحضور اجباري من المدرسة .. طبعا تخلل هذه السنوات اكمن جمعه دينيه بمحاضرات قصيره .. لكنها لا تذكر

 مش اني ما بحب احضر هيك اشياء .. بس الطابع العام و السلوكيات اللي بتسير في هاي الجمعات ما بتعجبني .. و اكيد مو دائما .. و ما بعرف ليش غالبا بروح مجبوره او محرجه من جارتنا اللي بتريدللي الخير دايما  

المهم و بما انه رمضان هاي السنه غير .. و بما اني قررت استحي على دمي .. و اعمل قورمات لحياتي .. عملت اول اشي ايحابي ألا و هو اني طلعت التلفزيون من غرفة نومي ..  لإني الى حد ما عايشه على ( 2 و 4) لا لشئ الا من الفضاوه .. و مش بس طلعت التلفزيون خارج الغرفه .. طلعته خارج البيت كمان .. بعرف انها حركه قوية حندم عليها مسنقبلا في لحظات الملل القاتل .. بس قلت خلي غيري يستفيد منه .. و بالفعل كان من نصيب المزارع .. طبعا التلفزيون  مش هالاشي المحرز .. بس بيلقط قنوات .. وهذا المهم عندي .. و بما انه في ثلاثة غيره في البيت فما حدا رحب فيه في غرفته .. اخذه صاحب النصيب ..

.. تلك كانت اول نفحه قوية اقوم بها في رمضان هاي السنه

ثانيا .. نويت اني اصلي التراويح كامله .. طبعا لأول مره بعملها .. الى الآن الله يتمم .. بتزكر و احنا صغار أيام المدرسة ما كنت اضيع على حالي صلاه تراويح .. بس كنا نتتفق انا و هالبنات نتقابل و نلعب و نعمل جمعات بالمسجد .. بس الحق يقال كنا نصلي العشا .. و هذا وجه الضيف .. بعدها سلامتكو و تعيشوا

 لما كبرت سرت اروح بس اصلي 4 ركعات و اروح .. أما أيام الجامعه ال 4 سنوات بالأردن  صليت التراويح و القيام  بالمسجد مره واحده فقط لا غير .. مش لإشي .. بس لإنه كانت المساجد اللي جنب بيتنا عباره عن حضانة اطفال منتنقله .. يعني لا خشوع ولا يحزنون .. لأ اصليها بالبيت احسن ..

بس هاي السنه غير … و بالفعل في اول يوم سألت جارتنا اللي كانت بتصلي جنبي اذا في اي مشاريع جماعية رمضانيه بالأجواء .. و كانت امسية اليوم  .. رغم الظمإ ريان

اكيد مش ندمانه اني رحتها .. بس يمكن تقدر استفادتي منها ب 40 % فقط .. 10% منهم اني طلعت من البيت و شفت ناس و اني كسبت نية الطلغة ..  بس احسن من البلاش .. صحيح اني استحيت من كثر ما تتاوبت .. بس ما باليد حيله ..  لم استطع ان اقاوم اجواء النعاس المحيطه بالمكان ..

ما بعرف ليش انا شخصيا لا استمتع مع دروس الدين الممله .. بعض المشايخ او المحاضرين ينقصهم اسلوب جذب المستمعين .. او ينقصهم اسلوب التشويق .. او ينقصهم اي اسلوب يمنع الحاضر من التفكير في اخذ غفوه ..

اكيد التعميم غلط .. انا لا اعمم و لكن عقلي الباطن استوطنت فيه هذه الفكره .. و تأبى ان تتزحزح منه .. نهائيا .. مهما حاولت .. مع العلم اني  حضرت  محاضرتين  للعريفي و محاضرة لعمرو خالد كانو قمه في الروعة فعلا ما بينتسو .. و الى الآن مهما حضرت محاضرات ما بستفيد كما يجب

صراحه .. مشوار اليوم كان غصب عني .. كنت غاصبه حالي عليه .. على امل ان اغير الفكره .. بس للأسف لم تتغير

في القاعه كان عدد الحضور يتعدى ال 160 (لأنهم سووا سحب على هدايا و الفائزه كان رقمها 167 عشان هيم عرفت العدد ).. هل من المعقول ان ال160  .. كلهم مستمتعين الا أنا .. مش عارفه

المفروض ان تبدأ المحاضره بعد التراويح – على 9.30 ما بعرف ليش بدأت على ال 10.10 .. و انا هناك من 9.20 ..  كل هذا اثرايجابا على الإعتقاد الخاطئ السلبي المتمركز في عقلي الباطن

… من 10.10 الى 11 و انا استمع و اتثائب .. مستمتعه بس مو كتير .. روحت على 11 و لسا البرنامج ما خلص .. بس السياره كانت بتستنى

ايش الحل .. هل الغلط فيي و الا فيهم .. هل في حدا بحس نفس شعوري ..  اكيد ما بعمم .. بس احيانا بفضل اني افتح على اقرأ او الرساله على اني اروح على درس دين جماعي

و من اكثر ما اثار جنوني عملية سحب جوالات الكاميرا .. هذا درس دين .. مين رح يطلع و يصور المحاضره .. انا بعرف بالأعراس، الحفلات، الصالونات ، بيسحبو الجوالات بس مش بدروس الدين

طبعا انا عرفت هذه المعلومه متأخره فإضطريت اني اخبي الموبايل بجيبي واعطي المسؤله على الباب لما سألتني عن جوالي و لما فتشت الشنته احلى ابتسامه صفراء مع هزة راس بإنو انا منيحه و ما معي موبايل .. بعرف انها ما حتاخذه معها على البيت و اني اخر الدرس رح يكون معي .. بس ما بقدر اعطيها اياه .. نفسيا بتنرفز .. كمان لإني فعلا احتجته ضروري  داخل المحاضره .. و مارح اصور حدا جوا

 .. استغفر الله

.. عيش كتير بتشوف كتير

.. و صلى الله و بارك