التوجيهي كان في ببيتنا..
Posted by: smilefirst on: July 4, 2008
لمده شهر مضى .. كان تقريبا هذا حالنا يوميا .. على هُس .. اسكتو .. خلو الولد يعرف يدرس .. وطوا صوت التلفزيون .. بدي أنام .. صحوني الساعه 4 إلا خمسه – مش 4 و لا 4 الا عشره – 4 الا خمسة .. شو بدكم تطبخوا .. طبعاً لازم تكون طبخات بتفتح النفس عشان الولد يعرف يدرس …. و الخ الخ من هالحكي ..
نتايج التوجيهي- ثالث ثانوي- طلعت على النت من أكمن يوم .. و بكره بتطلع الشهادات الرسمية من المدارس ..
المحترم أخوي .. رقم 4 في العيلة .. كان توجيهي علمي .. قدر انه يكسر الرقم القياسي لمعدلات التوجيهي في العيلة .. حيث ان آخر تجميع كان 98.1% قبل 6 سنين .. واللي جمعته حضرتي ودخلني “IT” عالجامعه الهاشمية أيام ماكنت فالحه ..
و هلأ الأخ مبسوط على حاله ب % 98.3
مع العلم انا سمعنا كتير سمعات تسريب أسئله و بيع و شرا ومن هالحكي في أغلب المدارس ..
ما بعرف الناس اللي هيك وين بكون ضميرهم .. و الا الأساتذه مربيّ الاجيال اللي ببيعوا اسئلة الإمتحانات ايش موقعهم من الاعراب.. ناهيكم عن الاهل اللي بيشتروا ..
98.3 % توجيهي سعودي ..” اهل الاردن و جميع الدول المجاوره بيعتبروا توجيهي السعودية لعب ولاد صغار وحكي فاضي” .. والاسئله من المدرسه و ليست من الوزاره .. و نظام العلامات تراكمي .. و أغلب اللي بنعرفهم جايبن 99 % و في أكمن 100% …
السؤال .. ايش التخصص اللي ممكن ينقبل فيه بجامعه حكومية مع هالمعدلات اللي ضاربه للسما ..
طبعا الجامعات الأهليه فاتحه ايديها بالأحضان وبترحب بالجميع ..
سؤال وجيه بس الله بس اللي بيعلم ..
28 Responses to "التوجيهي كان في ببيتنا.."
July 4, 2008 at 11:39 pm
m0rtada..
والله يعطيك العافيه عهالمعلومات المفصله .. كفينت و وفيت .. اي نعم ..
هادا الحكي كله بعرفه .. لإنه أخوي امتحن الإمتحانين .. و حتى كان في امكانيه انه يعيد الإمتحان الأول اذا ماكان محصل تجميع عالي..
و أخوي اللي قبله قدم الرامين و حاليا هو طالب في جامعة البترول سنه ثالثه ..
بس امتحانات الرام هاي على حسب علمي لا يعترف فيها الا في السعودية ..
وفي موضوعي كنت الى حد ما اتكلم عن القبول في الجامعات الأردنية ..
يعني بالنسبه لأي جامعه بره السعوديه لا تضع في اعتبارها مثل هذه الإمتحانات للقبول في الجامعات ..
شكرا مره ثانية على توضيح طريقه القبول ..
و اهلين بزيارتك ..
July 5, 2008 at 1:50 am
و الله الحال في سورية تعبانة و لكن في الطريقة المعاكسة
تكاد تكون الشهادات السورية هذه الايام حلم لكل طالب سوري و نيالو اللي بينجح و بينقبل بالجامعة
تخيلو اختصاصات الطب و بعض الهندسات المطلوبة قد وصلت للحصول على علامة تامة او شبه تامة في البكلوريا
ليس لك فحسب
مين بيقدر يجيب علامة قريبة من التامة ؟ هي بدها قدرات ربانية
July 5, 2008 at 5:06 am
ههههههههه
من يوم يومه توجيهي الاردن صعب…
انا بالنسبة الي ما بلوم الاهل او الشب اذا اشتروا الاسئلة ((في حال اتسربت )…
لانو جو الاحباط الجماعي اللي بيطغي على العيلة من يوم دوام في التوجيهي…بيحبط الكل…وطبعا قضية نجاح الابن او البنت هي قضي مصيرية بالنسبة للاهل…
وكلنا بنسمع عبارات مثل :
-لا تخزيني يابا وتوطي راسي بين الناس…ز
-خليك متل ابن عمك…نحيت ..دَريس…
-اذا ما نجحت ما في تكمل …رح اشتريلك لوح خشب و20 سي دي وروح بسط فيهم…
طبع اشياء اخرى كثيرة …بتخلي الطالب يبحث عن اي خيط لضمان نجاحه…
والله الله يكون بعونهم…
الف مبروووووووووووووووووووووووووك على التفوق لاخوكي..
انا ايامي …كنت علمي ..وجبت.. 85.2%…(( مش بطال )) ..
تحياتي
July 5, 2008 at 3:33 pm
ما شاء الله تبارك الله ؛؛
وصفك في البداية في حال البيت ايام الاختبارات ، ذكرتيني بحالتي قبل 6 سنوات تقريباً نفس الحاااااالة هههههههههههههه
ومبرووووك لاخوك ويحمد ربه هالسنة ان الاسئلة ما كانت من الوزارة والا كان شاف الويل …
الاجيال الجاية اذا بتستمر الاختبارات عن طريق المدرسين مو زي الطريقة القديمة راح ناس تنجح ونتايجها 100 % وهي ما بتستاهل حتى 80 % ..
كلامي هذا ما يدل ان اخوك مو شاطر ؛ اكيد كلكم شطار 
لانه طالع عليك خخخ ؛)
خليها على ربك
July 5, 2008 at 11:50 pm
ماشاء الله والله
عائلة متميزة 
ربنا يبارك
الحقيقة النظام الذي شرحه الأخ مرتضي أول مرة أسمع عنه ولكنه في الحقيقة ممتاز جدا ويقيس قدرات الطلبة بالفعل وإمكانياتهم ماعدا نقطة امتحانات المدارس
نحن أيضا عندنا في مصر الأمور صعبة جدا في الثانوية العامة وقد أذاقتنا أختي الويل أيام ثانويتها مع أني ممرت بالثانوية مر الكرام والحمد لله حصلت على مجموع عال ودخلت كلية الهندسة بفضل الله تعالى وكرمه
الله يوفق الجميع
وبالتوفيق لأخيك
July 6, 2008 at 2:30 pm
توجيعي !! ^_^
والله كانت أيام ..
صراحة ما في زي توجيعي الاردن أبداً !!
استنفار رسمي ..
بس ما شاء الله معدل اخوكي ممتاز ^_^
الف مبروك ..
وان شاء الله يدخل التخصص اللي بدو اياه وربنا يوفقو ..
تحيتي لك ..
July 7, 2008 at 2:04 am
ferasf ..
والله انا شايفه كله بده قدرات ربانية .. بس عنجد الله يعينهم اهل سوريا .. كتير سمعت ان كتير ناس بتروح عليهم .. و خاصه اذا كانوا مو من اصحاب المعجزات لحتى يدخلو التخصصات اللي بدهم اياها ..
********************
Mohammad Irshid …
الله يبارك فيك .. و زي ماقلت مرحله مصيريه بالنسبه للأهل و جعلكه لكل اهل البيت ..
سألله و هو جاي اليوم اللي يكون التوجيهي فيه زيو زي اي سنه تانية .. بس اشك انه حييجي ..
هادا انت كاين شطور .. اللي بعرف انه 85 يعني منيح .. أجدع حدا من قرايبي اللي بعمان ما جابها ..
*******************
جندبي..
بالظبط .. خليها على ربي.. يعني لو عملو احصائية لعدد ال 100% هاي السنه رح يطلع بالهبل ..
اسم الله عليهم .. أغلب هالطلاب متفوقين و عقولهم بتوزن بلد .. بس لنشوف ايش حيسير فيهم بالجامعات ..
و الله حرام اللي عم بسير .. لإنه ظلم كتير للناس اللي عنجد أذكيا و بدرسو ..
الله بعين..
July 7, 2008 at 2:14 am
مصطفى حسان ..
فعلا نظام امتحانات الرام اللي شرحها مرتضى مقياس حقيقي لمسوى الطلاب ..
و الثانوية العامه وين مارحنا سنه صعبه .. سواءا الاسئله زي الشوربه من المدارس او صعبه و لا تحل .. هاي السنه لازم العيله كلها تتبهدل ..
و الله يوفق الجميع ..
*******************
منيرة ..
الله يبارك فيك .. و تسلمي كتير..
*******************
رولا ..
اهلين فيك .. و الله يبارك فيك ..
عنجد توجيعي.. و استنفار رسمي.. جيران الجيران لازم يعرفوا انه عننا توجيهي ..
******
تحياتي للجميع .. و شكرا عالمرور..
July 7, 2008 at 3:22 am
مبروك لكم
-
أما بالنسبه لتسريب الأمتحانات ,,,
فالحمد الله !!
أعتقد ان هدا بمصر فقط !!
رغم أن العمليه التعليميه في الشرق الأوسط مثل البطيخ .. و لكن من كل بستان زهره !!
-
تحياتي !
July 7, 2008 at 4:14 pm
ماشاء الله عليه ..
تسريب الأوراق .. و الرشاوي .. على أفه من يشيل في كل دولة !!
و لكن في المقابل .. كيف هو الضمير؟!
July 16, 2008 at 8:56 am
مبروك نجاح اخوك وان شاء الله المزيد من النجاح في المراحل الدراسية التالية .
موفق ان شاء الله
تقبل مروري
وتحياتي
July 20, 2008 at 9:25 am
ما شاء الله عليه
و فعلا التسريب اصبح شئ موجود و بكثره و في معظم الدول العربيه اصلا …
إن شاء الله ربنا يوفقه في الجامعه
July 20, 2008 at 8:54 pm
السلام عليكم و رحمة الله و بركاته …
مبارك أختي لأخيك … 10000000 مبروك و يا رب بلتوفيق الدائم للجيمع ..
و الله بتذكريني بحالي العام لماضي و القبل الماضي … لا تليفزيون .. لا حاسب .. لا شىء … و أخي أكرمه الله يظل يتناول العشاء 6 شطائر تقريبا لمدة ساعة و نصف للإستمتاع بفيلم السهرة الأجنبي …
إذا قال أيقظوني الساعة كذا و ضبط هو منبهه يستيقظ البيت كله و هو يظل نائم … كما إن الثانوية لها طقوس معينة في الأكل …فعلينا أن نكثر من الأسماك المليئة بالفوسفور عشان ينوروا في الإمتحانات … و الحمد لله أنني أحب الأسماك ..
مبارك مرة أخرى عزيزتي سمايل …
تحياتي العطرة لك
July 24, 2008 at 5:34 pm
السلام عليكم
أول الشي ألف مبروك لخيّك .
تاني الشي، لما بزمانو من سنين قدمت البكالوريا (يلي عنا بالعامة بيسموها: بكى لو رأى ، على وزن سامراء)، كنت بعتقد أن سوريا أكتر بلد ظالم بالدني من هالناحية، وأن النظام كلو غلط ووووو
بس .. حالياً عم اتفاجأ، أن مثلا بروسيا هلئ دخلوا نظام الامتحان التخريجي الحكومي الموحّد لكل البلد، وعأساسو بيكون قبول الجامعات !
برغم الاختلاف الكبير بين أساليب التدريس في أوروبا والشرق الأوسط، إلا إنها مأخودة من بعضها اخر الشي، فطلعت شوربا بالأخير.
بظن الوضع ببلادنا العربية أصعب من غيرها، لأن عنا نسبة العطالة أكبر الشي بالعالم (12%) ، والغريب أنها بتزيد عند المتعلمين !!!
الله يعطيكِ العافية لحضرتك
July 29, 2008 at 4:05 am
لي واجب لكي اذا اردتي حله 
July 31, 2008 at 1:25 pm
ماشاء الله عليه يعجبني الانسان المجتهد..
اما مسألة تسريب الاسئله فعن نفسي عندي قناعه ان الطرق الملتويه لا تؤذي الا صاحبها ، ولا يوجد مكان يخلو من ضعاف النفوس فالأنسان الضعيف امام شهوة المال موجود في كل وقت وزمان ..
August 15, 2008 at 12:23 am
ظريف جدا. المدونة أعجبتني ولي عودة
تحية لك من لبنان
وأدعوك لزيارة مدونتي الطفلة
http://mabuturk.maktoobblog.com/
حيث جديدنا ينتظرك!
August 15, 2008 at 10:52 am
السلام عليكم و رحمة الله و بركاته …
كيف حالك أختي سمايل ؟ أين أنت ؟ مرت فترة طويلة لم تدوني فيها !
أرجو أن يكون المانع خيرا …
سلامي لك عزيزتي
August 19, 2008 at 1:04 am
هالسنة ما سوينا استنفار أبدا لأخوي
مع انه ثانوية عامة
أولا لأن أمي زهقت << ماشاء الله واجدين
ثاني شي لأن الامتحان القياس والتحصيلي عندنا بالسعودية كان على مرور النصف كله فما كنا نحس انه هو مسوي أزمة لنا
والحمدلله تخرج وسجل بالجامعة وقبل كم يوم طلعت نتيجته وافتكينا
أحس بعد كم سنة شهادة الثانوية العامة ما راح يكون لها قيمة .. خاصة أن السنة الجاية راح يكون فقط 10% عليها عند التسجيل بالجامعة والباقي على اختبار القدرات والقياس
ع البركة يا رب وعقبال الجامعة
November 17, 2008 at 10:43 am
انا مش خايف ارسب بس خايف ما اجيب معدل يدخلني التخصص الي بدي اياه
كمان الي بخليك تعصب ضغط اهلك عليك
بتدرس 7ساعات في اليوم وابوك بيجي بقلك انتا هامل ما بتدرس
او على ايش مركن لامصاري ولااراضي ولا بيوت
انجح احسنلك
(وهدا حال التوجيهي في الاردن)
December 28, 2008 at 2:58 pm
بدي ارد على smil first
انا توجيهي علمي السنة
صحتلي فرصة سفر مع بابا عالسعودية
قلت فرصة أخلص من توجيهي الاردن والضغط النفسي
المهم ما سافرت الا لما تأكدت انو الامتحانات عنا من المدرسة وامتحان القدرات يلي بيعملو ليلي بدو يدرس عندهم بالجامعات
اما يلي بدهم بجامعات الاردن متلي
في خمسة بالمية من مقاعد الجامعات الاردنية للمغتربين
يعني ازا جايبة 100 في احتمال 5%ادرس يلي بدي اياه
والله ما خلق اكتر من الجامعات الخاصة
راسليني على ايميلي لأحكيلك اكتر
mati2241991@yahoo.com
August 13, 2009 at 5:42 pm
مبروك لكل الناجحين والمتفوقين
حابب أتمنى للجميع التوفيق
لأنه التوفيق أهم من النجاح
النجاح مثل سهم مصنوع أحسن صناعة لكن إذا ما توفرله توفيق من الله
مثل اختيار صح
ومثابرة
وجو وبيئة اجتماعية
وصدق مع القدرات والرغبات
وفهم لسوق العمل
يعني باختصا رإذا ما توفق المتفوق
والله صعبة عليه
بس حابب أسأل
طالب أردني حابب يدرس بالسعودية ثانوية عامة
ويدرس طب بالأردن كيف ممكن يصير له فرصة ضمن 5% ؟
بليييز تساعدوني
Leave a Reply
July 4, 2008 at 10:33 pm
السلام عليكم..
في السعودية صحيح انو السنة الأسئلة من المعلمين وليست من الوزارة يعني بتصير الدرجات العامة طاقة السما !!!
بس يوجد اختباران يجب على الطالب انو يمتحنهم و هالإختبارين من مركز قياس ،، وهو مركز يسوي اختبارات على مستوى يعني مو أي كلام ولا له أي علاقة بالواسطة أو شي ثاني لأن التصحيح بالكمبيوتر.
الإختبارين هم :
1- اختبار القدرات (رام1) وهذا الإختبار يكون عبارة عن مسائل رياضية و ألغاز رياضية و قوانين عامة يعني كلو بالرياضيات. (أقل من 2% يجيبو فيه أعلى 90)
2- اختبار التحصيلي(رام2) وهذا الإختبار عبارة عن أسئلة لما درستو في الـ(12) سنة الماضية يعني اختبار شامل للمواد العلمية فقط “فيزياء،كيمياء،أحياء،رياضيات،إنجليش” . (أقل من 1% تقريباً يجيبو به 90)
——–
أما عن طريقة حساب معدل الدخول بالجامعة ،، على سبيل المثال نأخذ جامعة البترول و هي أقوى جامعة هندسية بالمملكة :
وحتى لو داخل الطالب بمدرسة خاصة و جايب 100% بالعامة ما تنفعو لانو باقي التحصيلي و القدرات ،، وهذولي الإختبارين بني كلاب 
يتم حساب قبول الطالب بــ:
20% على شهادة الثانوية العامة.
30% عى اختبار القدرات.
50% على التحصيلي.
،،، و بما إنو التحصيلي و القدرات و خصوصاً التحصيلي عليه النسبة الأكبر فإذاً مو أي واحد راح يدخل الجامعة
أتمنى أني وفيت و أتمنى وصلت الفكرة…
تحياتي ..مرتضى