يوم الثلاثاء  ….  كان يوم حافل بمعنى الكلمه ابتداءا من الساعه التاسعه صباحا .. تعب نفسي و بدني .. طبعا النفسي اكثر ..  في هذا اليوم الرائع والجميل اكتشفت انه لو كان لابوي اربع أولاد بدل ثلاثه بكون احسن .. لإنه الثلاثة وجودهم و عدمه واحد

يوم الثلاثاء ….  رحلنا لبيتنا الجديد .. طبعا الرحيل وقته جدا خاطئ ومعارض لمشاريع الجميع لكن الظروف والضغوطات الخارجيه كانت  اقوى لذا اضطرينا انه نرحل مع العلم اننا مبلوشين بسقرنا للصيف اللي بعد 3 اسابيع تقريبا بالاضافه لان اخوي اللى في الجامعه عندهم فاينل “يعني شطب مو مستعد يساعد .. و الشب مش معتبر نفسه فرد من افراد البيت – خيّرنا بين الرسوب او المساعده – نِعم الإبن ”.. و المحترم الثاني امتحانات ثالث ثانوي ”  توجيهي ” و ما ادراكم ما التوجيهي – والمشكله انه كإنه العرس بدار الجيران – و هذا كمان بهدد بالإنه ما حيفلح في حالة طلبنا المساعده منه “ .. و الثالث بالابتدائي موعارف الله وين حاطه

المهم باليوم الموعود و يوم الرحيل ,,, الثلاث شباب - عين الله تحرسهم –  ولا واحد دخل باب البيت قبل العصر، يعني بعد ما خلصنا ترحيل - واحد عنده امتحان و الثاني بالمدرسة بيدرس و الثالث الصبح بالمدرسة و بعدها بودع صحابه لإنه حيرحل .. بمعنى اني كنت لحالي مع عمال النقل ” الحمالين ” من الساعه الساعه تسعة صباحا لبعد صلاة الظهر .. انا في البيت القديم مع العمال و ابوي – اللع يقوية تعب خيرات اللع يومها – كان في البيت الجديد مع عمال الصيانه و الكهرباء و هاي الخرابيط ..اكتشفت كمان انه بيتنا مليان كحاكيش .. نقلنا الاساسيات بس على 3 دفعات مع انه الشاحنه كانت كتير كبيرة

و بعد هذا اليوم اقتنعت 100% انه في بيتنا المصون هناك مساواه عظيمه بين الذكور و الاناث .. و حق المرأه في الاحترام الزائد والدلال والراحه و التوجيب معدوم في هذه الظروف - حتى(  روحي انظبي يا بنت ) ما بقولوها .. بقولوا ( إلبسي عراسك و تعالي اتفاهمي مع السباك او الكهربجي) - بحكم ان خواني ما بيعرفوا

بهدول اليومين تعاملت مع عمال و صيانه على عدد شعر راسي .. و اللي متعبني نفسيا ان كل ملامح النعومه و الحنية المصاحبة لطبيعتي انمسحت من صوتي و ملامج وجهي

بداية الكشره انرسمت – لإنه مش معقول ابتسم بوجه عامل هندي او بنغالي .

 ثانيا صوتي سارت نبرته وحدّته أعلى لتقارب الصراخ .. بالاضافة الى تطيبقى لبعض الكلمات بالسعودي المكسر على شوية هندي .. مع العلم اني من اشد المعارضين لهذه اللهجه في الكلام .. أولا و هو الاهم إني ما بعرف احكيها .. ثانيا عندي قناعه انه لهجتي هي الأصل و الهندي المفروض يفهم عليّ  مش اني اغير طريقه مخارج الحروف و اكسر كلامي و اتلاعب بالضمائر و المفردات حتى حضرته يفهم عليّ ,,  بس الظروف كات اقوى 

 بالمحصله حاليا بتمنى ان نبرة صوتي و طريقتي في الكلام ترجع زي أول ..  زي البنيأدمين .. و يرجعوا اهلي يعاملوني على اني البنت الوحيده حاليا في البيت

و لكي اكون حقانية  – بحكم اني بخاف ربي –  في شغله وحيده كنت ممنوعه اني اعملها .. وهي حمل الكراتين و رفعها او حتى جرها .. هاي كنت ممنوعه نهائيا منها .. و اهلي بيهدلوني بس يشوفوني حامله كرتونه ولو كانت خفيفة.. بحجه اني مسموح اخسر انوثني لأكمن يوم بس ظهري لأ ، نهائياً قطعاً و بتاتاً 

و في النهاية .. الحمد لله البيت الجديد رائع … مازال فوق بعضه .. ولا بعد شهر بيخلص ترتيب .. وبحكم انه الشغالة اللي عنا حتكمل السنتين الشهر الجاي ولساتها ما بتفهم عربي وما بتعرف تحكي اسمي زي الناس، مش عارفه ليش انا الوحيده بالبيت اللي ما بتعرف تنطق اسمي .. و لا بتفهم علينا طبعا .. فعشان هيك كل ما نطلب منها ترتب اشي بتسويه غلط و بتضطر اعيد الشغل وراها .. فقررت اخليها مرتاحه احسن .. لإنه التعامل معها مو احسن من التعامل مع العمال الآنفي الذِكر

ختاما .. الله يحعل البيت الجديد قدم خير علينا