كلام الليل يمحوه النهار ..

مقوله او حكمه او مثل .. مابعرف ايش اصلها .. بس بآمن فيها 100% ..

البوست اللي كتبته قبل اكمن يوم عن “ الناس اجناس ” .. مسحته مبارح .. ما بعرف ليش  اصلا كتبته .. للمعلوميه كتبته بالليل .. و اندمجت بكتابته .. و يمكن من ورا التعليقات اللي قريتها حسيت انه الموضوع انفهم غلط .. و حطيت حالي بصوره مو حلوه .. و بجميع الاحوال الموضوع كان عباره عن حكي فاضي و لعي بلا طعمه ..

و انا اصلا ما بحب احكي و استغيب بهالناس .. بس احيانا بكون مش بإيدي .. لساني متبري مني .. و بحكم فطرتي وعوامل الوارثه كتير مأثره فيي و بتجبرني اني اضغط على حالي و ما اخلي حدا بحاله بدون ما اعلق على اي اشي ما عجبني .. لو بيني و بين نفسي .. بس ما بقدر اخلي الموصوع بدون comment ..

و برجع و بقول كلام الليل يجب ان يمحوه النهار .. لإنه ابداعات آخر الليل احيانا بتخرب بيوت ..

هاي المقوله اقتنعت بصحتها يوم من ذات الايام فبل سنتين و شوي  .. من زمان و احنا بنسمعها و بنحكيها من باب المزح .. بس يومها اقتنعت بواقعيتها ..

اللي صار اني قررت اني اقضي الليل عند صاحبتي بحكم انه كان عنا مشروع شغالين عليه بسنه التخرج و كنا مبلوشين لأرائيط أداننا .. وآخر الليل، قبل الفجر بلشت ملامح التسطيل تظهرعلينا .. لدرجه انا بلشنا نحكي حكي يمكن ما كان لازم ينحكى و نفتح بواب مسكره و بلشت كل وحده تشعبر عن مكنوناتها الداخليه .. و ثاني يوم بعد قهوه الصباح استرجعنا بإختصار اللي انحكى قبل ما ننام واتفقنا انه كلام الليل يمحوه النهار، بحكم التخبيص اللي خبصناه بالليل .. و من يومها مسموح اي اشي ينحكى بالليل بشرط انه يكون منسي بالنهار .. بس مش مع الكل بتزبط هاي الشغله .. في ناس بتلاقيهم موقفينلي على الدقره على اي كلمه هيك او هيك بتنحكى ..  

و من يومها و انا بخاف من اني اخبص بآخر الليل .. و بحاول ألاقي علاج للساني اللي مفلوت منى و مش راضي ينضب ..

الحياه جدا جدا جميله ..