من الرائع جدا ان يكتشف الشخص اكتشافا.. او بالاحرى استنتاجات .. تعطي نتيجه .. بالنسبه إلي بسميها اكتشافات ..

كل هادا لإني بعد ما قرأت موضوع الواجب عند سامي منصور و قرأت الناس اللي ممرللهم الواجب .. لفت نظري مدونه بنت الروح ..

لاسيما انه قبلها بيومين كنت بكلم صديقتي .. و كنت بدي ابعتلها اشي فسألتها عن ايميلها قالتلي انه بنت الروح @ مابعرف ايش. كوم .. المهم اني ما بعتلها الايميل لإني ماحفظت ايميلها منيح .. ياعيب الشوم عليي..

نرجع … بإني زرت مدونه بنت الروح .. قرأت اول موضوع عجبني .. رحت للموضوع الثاني اللي لفت انتباهي .. و هو انها توظفت اخيرا بس وظيفه مدربه بمعهد .. و انها كرهانه الوضع .. وقتها حسيت اننا ” same same ” انا و هيه لاني كرهانه التدريس كمان .. و انها ساكنه بالشرقيه ..

و من ثم قررت ادخل بالمواضيع اللي كاتبيتها عن حالها قرأت موضوع عن طفولتها و انه التلفزيون ما دخل بيتهم .. على طول تذكرت صاحبتي نفسها -اللي ما بعتلها الايميل-  .. لإنو ابوي كان دايما يجيبلنا سيره عيلتهم بالخير و يضربلنا الامثال فيهم ..  و كيف انه المفروض نسير زيهم و نشيل التلفزيون .. و بالذات برمضان لإننا بنكون عايشين عليه .. و لانه مافي من وراه خير ..

و تأكدت انها هيه اللي ببالي لما جابت سيره تحفيظ القرآن ..

وقتها بالذات اكتشفت انه صاحبه مدونه بنت الروح هي صديقتي و جارتي سابقا و بنت صفي من زمان .. فبعتلها على ايميل المدونه نكشة راس من ايميلي اللي هيه عارفته ..

كنا بتحفيظ القرآن في نفس الفصل .. اذكر اني تركت التحفيظ بصف خامس .. بس هيه استمرت .. و ضلينا جيران مرحلة الابتدائيه .. و بما اننا بنفس المدرسه كنا نروح سوا بالباص .. و بنفس الفصل .. بس اطن بالثانويه افترقنا ,, هي ب( أ) و انا (ب) او العكس ما بتذكر ..

و خلصنا جامعه بنفس التخصص .. تكنولوجيا معلومات ..  بس انا بعمان و هيه بالسعوديه .. و حاليا و بعد التخرج بيننا تلفونات غالبا محور الحديث عن رحلة البحث عن وظيفه  .. بحكم اننا بالهوا سوا …. اللي بتلاقي اشي بتخبر الثانيه .. و غالبا هيه بتخبرني بالجديد .. يعطيها العافيه ..

سبحان الله .. الدنيا صغيره ..

مع اختلاف الجنسيات .. بس كان النا كتير صحبه مشتركه .. و عنجد اني بعزها لهاي البنت ..

و اليوم كلمتنى و فتحنا الموضوع و تأكدت انها هي هديل اللي انا شاكه انها هيه “ بنت الروح ” ..

و ابديت اعجابي بذكائي المتواضع اللي خلاني اكتشف انه صاحبتي اللي بعرفها من زمان و صاحبه المدونه هم نفس الشخص ..

بالله مش شعور حلوة انه الواحد يكتشف زي هيك اشي ..

الحياه جميله..