اليوم الله رضي على و رحت على درس دين.. سارلي فتره منيحه ما حضرت اي دروس ..

كنا انا و امي من اوائل الحضور .. لذا لفت نظري شئ غريب بالموجودين .. صمت و هدوء و حتى ان واحده منهم كانت عيونها منفخه من كثر البكاء..

 بعد السلام فهمت الموضوع ..

كان الجميع متأثر بما حدث في غزه من مستجدات ..من  قطع الكهرباء عن كامل المدينه و زياده عدد المتضررين من الانقطاع  بالذات في المستشفيات ..

صراحه انا ما كان عندي خبر نهائيا بالموضوع .. اولا لأني لست من متابعي التلفاز بالاضافه الي انه اذا فتحت امي – الله يرضى عليها – قنواتها المفضله - كإقرأ و الاقصى – انسحب من الجلسه .. الله يهديني و اياكم اجمعين ..

الدرس كان فعلا قمه في الروعه.. و لا سيما انني كنت من القله القلائل في الجلسه من غير الاصول الفلسطينيه .. فكانت  بعض المعلومات و الوقائع التى ذكرت عن فلسطين و غزه بالذات  اسمعها لأول مره ..

فكل واحده من الحاضرات بدأت بسرد احداث اخر زياره لها لفلسطين .. و اوضاع الناس هناك على مرأى عبنها.. فعلا قصص مؤثره تسمع من الناس لا على التلفاز ..

المهم حولت المحاضِره  موضوع  الدرس الى الحديث عن اقل  واجباتنا تجاه فلسطين و العراق ..

من اهم  النقاط الذى ذكرتها.. و كانت موجهه لنا نحن الفتيات خصوصا .. و لاسيما مع موسم التخفيضات  المغري بالاسواق .. اللي بخلي الواحد يشترى الملابس و لو ما بيحتاجها .. اشتري الالوان اللي ناقصتنى من الحقائب  و الاحذيه ..  بس لانه سعرها فيه  50%  او 70% خصم ..  

فلو الواحد استغنى عن هذه الكماليات و اعطاها لناس يفتقدون اهم الاساسيات ..

تطرقت المحاضره  لمواضيع فعلا اصبحنا نسهو عنها..

يا جماعه بالرغم من حمله غلاء الاسعار اللي ما النا سيره غيرها .. مع ذلك ما حرمنا انفسنا من الالبان و لا من الكورن فليكس  و لا من الرز و الخبر و لا حتى الحلويات او الايس كريم  و لا من شئ .. لانا اعتبرنا بعضها من الضروريات  و الاساسيات .. اعترضنا على غلاء الاسعار و مع ذلك و لله الحمد الله عاطينا و بنشتري ..

فما بالكم بالناس  اللي و الاسعار رخيصه ما كانو يقدروا يشتروا.. فكيف الان ممكن يشتروا..

تخيلو جره الغاز … المستلزم الاساسي و الضروري في كل بيت .. و لاسيما مع جو البرد الذي لم نشهد مثله من سنين .. اصبح سعرها في فلسطين  ما  يعادل  12 دينار و هو تقريبا 63 ريال سعودي .. و جره الغاز لا تصمد اكثر من اسبوعين في اي بيت في هذا البرد ..

فكيف عايشين الناس .. كيف اهل غزه عايشين و الكهرباء مقصوعه عنهم و منهم من لا يملك ثمن الاكل ليملك ثمن جره الغاز للتدفئه..

 و احنا بس نزهق بنفتح الانترنت بس علشان نقرأ و نتسلى و نضيع وقت و ندفع مصاري .. و تدفئه البيت مفتوحه .. و الي ما عنده تدفئه مركزيه بتون الصوبه او المدفأه بحواره ..

صراحه.. لما قالت هذه الجمله .. طننت في رأسي ..  انا وحده ما بقدر اعيش بدون انترنت في البيت .. اذا مر يوم ما شيكت عليه او كان في مشكله بالشبكه.. بحس في اشي ناقص و ما بقدر.. و ببدأ ادور على اي مكان ثاني ممكن اني اشتغل فيه على الانترنت .. هاذا و انا بعتبر نفسي من اللي بيستخدوا الجانب المفيد من الانترنت ..

الله بعيننا بنحرم حالنا هذا الشهر من بعض المترفات في حيانتا .. مو لازم لما نروح نتبضع نطلع بكماليات ممكن نعيش بدونها.. مو لازم كل اسبوع نتغدى بمطعم .. مو لازم .. مو لازم .. نوفرها و نعطي ثمنها هذا الشهر لفلسطين ..

تطرقت ايضا لموضوع المقاطعه.. مقاطعه المنتجات الامريكيه و مقاطعه ممكولين اسرائيل.. اللي كتير ناس نسيو المزضوع .. قاطعو فتره و بعدين رجعوا… ليش ؟؟

واهم شئ الدعاء..حتى انها اقترحت صوم يوم الثلاثاء لوجه الله .. و الدعاء فيه لفرج كربات اخواننا..

فلسطين ليست فقط لأهلها.. هي لنا جميعا .. سكان فلسطين ما اختاروا انهم يولدوا فيها و يكونو من اهلها..

فإذا كان البلاء ليس في بلدك و لا في بيتك  فإحمد ربك  مره و اثنين و ألف  و لا تنس غيرك ..

يالله صبر اهل الكرب عليها و فرج عمهم ..

اغلبنا بيعرف الحكي اللي حكيته و اكيد في نا س تطبقه.. لكن ( و ذكر فإن الذكرى تنفع المؤمنين ) ..

صراحه حسيت انه من واجبي انقل الامانه اللي حملتها لما طلعت من الدرس ..

بطلب التضامن  مع أهل فلسطين بالدعاء و الصدقات .. 

الدنيا لسا فيها خير .. و كلنا فينا خير .. الله يقدرنا على فعله ..

خلي حياتهم جميله زي ما حيانتا جميله …